Kirolgune berria atondu nahi du Artziniegako Udalak Barcena inguruan. "Etorkizuneko diseinua planifikatzeko eta dauden espazioak optimizatzeko" abiatu dute prozesua, tokiko erakundeak sare sozialetan azaldu duenez, "eskuragarritasun ekonomikoa kontuan hartuta".
Zirriborroa, abiapuntu
Udal gobernuak zirriborroa osatu du horretarako, herritarren ekarpenak jasotzeko asmoz. Lau eremutan bereizi dute egitasmoa, "proposamenak zentzuzkoak eta egingarriak izan daitezen" . Ondorengoak dira luzatutako ideiak:
- Egungo futbol zelaia bitan banatzea, aldamenean jolas gunea, mahaiak, haurrentzat jolasak eta bestelako kirol eskaintzak txertatuta.
- Eskailera eta berdegune bidez, padel pista edo futbito-saskibaloi zelaia eraikitzea.
- Skatepark edo antzerako gunea atontzea.
- Hesitutako gune bat sortzea, maskoten aisialdira bideratzeko.
"Iradokizunak helarazi nahi dizkiguzuen guztiok udaleko info@artziniegakoudala.eus helbidera bidal ditzakezue edo, bestela, udal bulegoetan pertsonalki erregistratu", zehaztu dute oharrean, "berriro diogu, zuen ekarpenak edo ideiak jaso arte egiten dugun proposamena da".