Artziniegako udal ordezkaritza jeltzaleak gogor kritikatu du PPk martxoko udalbatzan izan zuen jarrera, pasa den ostegunean eginikoa, hain zuzen. Zehazki, EAJk leporatu dio alderdi popularrari Arabako Batzar Nagusietan eztabaidatutako bi mozio eramatea Artziniegara, "bere jarduera urria apaintzeko".
Jeltzaleen kritikek hiru bide hartu dituzte. Alde batetik, proposatutako testuek erkidegoko eskumenei buruzkoak direla azaldu dute, udalak ez baitu eragiteko aukerarik. Bestetik, EH Bildurekin testuen onarpena adostea egotzi diote PPri, EAJren zuzenketak ezer ezean utzita. "Elejalde jaunak, Alderdi Popularreko zinegotzi bakarra den aldetik, EH Bilduren babesarekin eta laguntzarekin bere jarrera erabakita zuela ikusi genuen", azaldu du Encina Castresana bozeramaile jeltzaleak.
Horrez gain, jeltzaleek adierazi dute mozioetako bat -Araban anbulantzia medikalizatu gehiago eskatzen zituenak- gezurretan oinarrituta zegoela. "PPk aurkeztu zuen informazioa zalantzazkoa da, eta EAJ-PNVk eta PSE-EEk osatutako koalizio gobernua higatu nahi du, COVID-19ren pandemia egoera aprobetxatuz eta ez dagoen polemika sortuz", azpimarratu du Castresanak.