Artziniegako EAJk oharra plazaratu du Joseba Vivanco alkatea Sevillan jokatu zen Errege Kopako finalera joan izana salatzeko. Jeltzaleak "harrituta" daudela onartu dute, COVID-19aren hedapena ekiditeko helburuarekin autonomia erkidegoen arteko mugikortasuna mugatuta baitute herritarrek.
Encina Castresana bozeramaile jeltzaleak azaldu duenez, udal-taldeak eskaera erregistratu du Artziniegako udalean alkateak Informazio Batzorde berezian azalpenak eman ditzan. Batzorde horretan Vivancok Sevillara egindako bidaiaren arrazoiak argitzea, bai eta bertara joateko erabilitako jusitifikantea zein zen ezagutzea espero du EAJ alderdiak.
Bestalde, Joseba Vivancok Athletic-Erreala futbol partidaren harira GARA egunkarian sinatutako zenbait artikuluren inguruan galdegin dute ere ordezkari jeltzaleek. EAJren esanetan Vivancok alkate funtzioak betetzeko dedikazio esklusiboa du, eta ondorioz, ezingo luke beste lan batengatik dirurik jaso. Artikuluak sinatu izana "Artziniegako herritarrekin hartutako konpromisoa hausten duela uste dute".
Joseba Vivancoren erantzuna
Artziniegako alkateak beste ohar bat plazaratu du, EAJk zabaldutakoaren aurrean herritarrei argipenak emateko. Artziniegako alkateak ziurtatu du "EAJren hitzak ez duela inolako sinesgarritasunik".
Vivancok azaldu bezala, urteak darama GARA egunkarian lanean kirol kazetari moduan, eta azken 8 urtetan Athletic Club futbol taldearen egunerokoa jarraitu du. Alkatetza lortzearekin batera eszedentzia eskatu zuen jardun berriari heltzeko, baina ziurtatu du egunkarira itzuliko dela: "EH Bildun ez dugu ate birakaririk, Artziniegako EAJk, ordea, ezin du bera esan".
Ohikoan Athleticen informazioa jarraitzen duen kazetariak ezin zuenez La Cartujan jokatuko zen partidaren jarraipena egin, egunkariak Joseba Vivancori proposatu zion Sevillara joateko aukera, beste kazetari eta argazkilari batekin batera.
Artziniegako alkateak GARA egunkariak emandako justifikantea baliatu zuen bidaiatzeko, eta azpimarratu du ez duela inongo dirurik jaso euskal taldeen finala jarraitzeagatik. "EAJk leporatzen didan inkonpatiblitatea ez da existitzen, ez baitut ordainsaririk jaso kolaborazio puntual honen truk".
"Herri txikia gara, elkar ezagutzen dugu. Nik kontzientzia oso lasai daukat" adierazi du alkateak. Amaitzeko herritarren batek azalpen gehiago nahi izanez gero udaletxeko ateak zabalik dituela gogorarazi du Joseba Vivancok