Herritarren partaidetzarekin ospatu nahi dute Artziniegako hiribilduaren 750. urteurrena

Atzo 17 lagun inguru batu ziren bileran. / Artziniegako Udala

Atzo udalak bilera deitu zuen bere proposamena zabaltzeko herritarren artean. Erakundearen asmoa da Artziniega hiribildu izendatu zutenetik 750 urte igaro direla ospatzea, herritarrekin elkarlanean.

Atzo arratsaldean bilera antolatu zuen Artziniegako Udalak. Hiribilduaren aitorpenaren urteurrena landu zuten. Izan ere, 750 urte beteko dira udalerriari izaera hori aitortu ziotenetik, 1272. urtean.

Data ospatzeko, udalak herritarrei proposatu die hainbat ekitaldi antolatzea 2022an eta horretarako eredu mistoa baliatzea. Hau da, tokiko erakundeak parte hartzea antolakuntzan, baina baita herriko elkarteek eta norbanakoek ere. Xede horrekin, kontseilua sortzea da asmoa, elkarteek eta udalak esparru berean lan egin dezaten.

3 batzorde, 3 lan ildo

Kontseilu horrek 3 batzorde izango ditu, zeinetan herritarrek euren ekarpenak egiteko aukera izango duten, norbanako bezala. Proposamen horiek eztabaidatuko ditu kontseiluak.

Printzipioz, batzorde horiek hauek izango lirateke: ekonomikoa -udalak jarriko duen diruaz gain, baliabide ekonomiko gehiago eskuratzeko-, historikoa -historiari lotutako edukiak jorratzeko- eta egitarau batzordea. Azken hori arduratuko da planteatzen diren ekintzak antolatzeaz.

Izen ematea

Gauzak horrela, udalak inprimakiak utzi ditu eskuragarri bere webgunean, liburutegian eta udaletxean, interesdunek izena eman dezaten.

Edonola ere, Unai Gotxi zinegotziak argitu du proposamena hobetzeko ideiak jasoz gero, aintzat hartuko dituztela. Hasteko, atzo 17 lagun inguru batu ziren bileran eta espero dute jende gehiago ere animatzea.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide