Proposamena luzatu dio Artziniegako EAJk udal gobernuari: udalerrian kirol anitzeko pista berriak eraikitzea, “bizikletan, patinetean edo skatean pump-tracka bezalako diziplinak gauzatu ahal izateko”. Zehazki, honakoa da udal talde politikoko kideek proposatu dutena: “pump-track zirkuitu bat jartzea, bai bizikleta modalitatean, bai patinete edota skate modalitatean, udalerriko kirol eremuan".
Jeltzaleek nabarmendu dute geroz eta gehiago direla horrelako jarduerak egiteko guneak eskatzen dituzten bizilagunak, eta horrelako espazioek “aisialdi aktiboa eta osasungarria” sustatzeko balio dezaketela.
Encina Castresanak azaldu duenez, helburu bat bilatzen dute proiektu honekin: “Aisialdirako, eta batez ere, asteburuetarako alternatiba bat ezartzea”. Gauzak hala, “joera berrietara” moldatzeko beharra jarri du EAJko zinegotziak mahai gainean, “bereziki udal espazio publikoei dagokienez".
Horrez gain, Castresanak gaineratu du horrelako jarduerek balio dutela “aisialdi inklusiboa era berdintasunezkoa” sustatzeko, kirol mistoak direlako eta edonork praktikatu ditzakeelako.