Kontzertu berezia prestatu dute Artziniegako Rock Elkarteko kideek biharko (ostirala, abuztuak 6). “Ia 20 musikarik parte hartuko dute, elkarren artean nahastuta”, azaldu du Xabier Vellek, “hau da, 20 lagun nahastuko gara ‘konbo’ batzuetan, abesti mitikoak jotzeko”.
Emanaldia oso dibertigarria izango dela ziurtatu du elkarteko kideak, “rockeroen festa” izango baita.
Aniztasuna da elkartearen bereizgarrietako bat. “Mota askotako parte hartzaileak ditugu: txikiak, hasiberriak, helduak, eskarmentu gehiago edo gutxiago dutenak... baina berdin zaigu, garrantzitsuena ondo pasatzea eta musikaz gozatzea baita”.
Hala ere, rock taldearen osasuna ez da onena une honetan, Vellek aitortu duenez. “’Ohikoan antolatzen diren jarduerak geldituta daude: rock eskola, klaseak, emanaldiak, maketa lehiaketa, kontzertuak… pandemiak bortizki jo ditu musikariak eta kultura orokorrean”.
Hala ere, gogotsu azaldu dira taldeko kideak etorkizunera begira. “Poliki-poliki saiatuko gara berriro ekintzak antolatzen, baina ez dago gure esku pandemiak ekarriko digun araudia”. Ildo horretan, musika klaseak berreskuratu nahiko lituzkete datorren ikasturtera begira.