Gaur (irailak 21) aurkeztuko du CEAR-Euskadik Zurrumurruen Aurkako Estrategia Artziniegan. Toñi Luengas frontoian izango da zita, goizeko hamaiketan.
Dinamika aurkeztea eta "kulturen arteko elkarbizitzarako gune bat irekitzea" izango da ekimenaren xedea. "Hortik aurrera, jarduera eta ekintza desberdinen bidez bidea egingo dugu hainbeste zarata sortzen duten eta elkarrekin bizitzen uzten ez diguten zurrumurruak ekiditeko", azaldu dute antolatzaileek.
Horretarako, indarra egin nahi dute herritar bakoitzak bere harreman pertsonaletan eta egunerokoan eragiteko duen "ahalmenean".
Dinamika eskualdeko beste herri batzuetan aurkeztu da dagoeneko, Laudio eta Amurrion kasu, eta lan-talde iraunkorrak sortzera iritsi dira.
2016an abiatu zen egitasmoa, antolatzaileek oroitu dutenez: "Arabako Foru Aldundiak agintaldiko lan ildo gisa finkatu eta elkarbizitzaren aldeko planak eta xenofobiaren aurkako borroka sustatu ondoren, eta ZAS! Zurrumurruen Aurkako Sarearekin bate egin ondoren, gure lurraldean zurrrumurruen kontrako ohartarazpen sozialeko estrategia bat abiarazi zen, zehazki Arabako Lautadan, Aiaran eta Kanpezu-Arabako Mendialdean".