Artziniega Museoa bizitzaz gainezka egon da asteburuan, Camila Hunck film laburra grabatzen aritu baitira larunbatean eta igandean. Proiektua, berez, pelikula luzea izateko sortua izan zen. Baina, ekoizpen arazoen ondorioz, bere egileak (Antonio Perez zinemagilea) erabaki du istorioa zatitzea: "Hasierako ideia Cavernarius filma egitea zen. Ondoren, pertsonaia ugariren artean, bi hautatu ditugu eta horrela ekin diogu Camila Hunck egiteari".
Arrakasta izanez gero, atal gehiago grabatzeko aukera izango lukete. Hala ere, Perezek argitu du filma egitea oraingo helburua: "Lan handia suposatu digu".
Berez, istorioa Asturiasen girotua dago, Frankismoan. Camila izeneko neska da protagonista eta mauisa laguntzen du. Zuzendariaren ustez, ideia arraroa da finantzazioa lortzeko: "Maquisen eta Neanderthalen historiak batzen ditu. Oso garai ezberdinetan bizi arren, biak ezkutatu behar izan ziren kobazuloetan bizirauteko, hil nahi baitzituzten".
5 urteko lana ekarri dio proiektuak Antonio Perezi: "Maquisak nola funtzionatzen zuen jakiteko elkarrizketak egin nituen eta horretaz gain, antropologia ere landu behar izan dut".
Artziniegako kokapena
Zehazki, museoko bi areto erabili dituzte filmean; sukaldea eta ikasgela. Txema Maquesek egin zuen hautaketa. Ibilbide luzea egin du zineman eta, horrez gain, Patria telesaioan ere egon da.
Artziniega Museoaren laguntza goraipatu du taldeak, zuzendaritzako kideak egon baitir asteburu osoan laguntzen.
Ramon Barea, Leire Orbe eta Ane Fuentes
Pertsonaien aldetik, protagonista Camila da eta Ane Fuentesek antzezten du. Gazteak adierazi du bere lehen pelikula dela eta asko ikasteko balio izan diola: "Jende ugari dago grabaketan, eta guztiek lagundu eta babestu naute".
Horien artean dago Ramon Barea. Aktore beteranoak esan dio Aiaraldea Komunikabideari ahal izan duen guztia egin duela Ane Fuentes eroso aritzeko: "Nire lehengo filma egin nuenekoa ekarri dit gogora, La fuga de Segovia, hain zuzen". Bareak Camilaren aitonaren papera egiten du eta bera ere Maquisarekin elkarlanean aritzen da ikus-entzunezkoak.
Azkenik, Leire Orbe irakasle baten azalean sartu da grabaketan.
Argazkiak: Paki Ofizialdegi eta Aitor Aspuru