Artziniegako Ortiz de Molinillo eta Velasco dorretxea birgaitzeko lanak abiatuko dituzte aurki. Udalak iragan ostiralean sinatu zuen obrak gauzatzeko esleipen kontratua Aplibur eraikuntza enpresarekin. Obrek 325.372,44 euroko kostua izango dute, eta bost hilabetez luzatuko dira. Eusko Jaurlaritzak 200.000 euro jarriko ditu, eta Europako Funtsetatik beste 100.000 euro jasotzea espero du udal gobernuak.
Abuztu hasieran hasiko dituzte lanak beranduenez. Hauen helburua izango da eraikina birgaitzea eta hotel erabilera izatea berriro. Besteak beste, teilatua aldatuko dute, eta beheko solairuko irisgarritasuna bermatu.
2023an hotela zabalik
Udalaren asmoa da 2023an Artziniegako dorretxean hotel zerbitzua eskaintzea, datorren urteko udan, hain zuzen ere. Hotelaren kudeaketaren esleipena lortzen duenaren ardura izango da beharrezko altzairuak eta bestelakoak eskuratzea. Hotela ez ezik, taberna eta jatetxe zerbitzuak berreskuratzea ere planteatu du Udalak.
"Artziniegarentzat hain beharrezkoa den jarduera honen bidez, hotel-eskaintza hori berreskuratzea lotuko dugu, eta legealdi honetan EH Bilduk hartutako beste konpromisoetako bat betetzera bidean jartzen gara", azaldu du Joseba Vivanco alkateak.