Azaroaren 5ean egingo dute Arrankudiaga-Zolloko Trail Lasterketaren IX. edizioa, baina ireki dute dagoeneko izena emateko epea. Sportmaniacs.com atarian bete behar da inskripzioa. Dortsalak, aldiz, egunean bertan jasoko dira, Elexalde kaleko 23. zenbakian dagoen lokalean, lasterketa bakoitza baino ordu erdi lehenago.
Hiru proba
Hainbat proba barnebilduko ditu azaroko zitak. Txakurkrosa egingo dute lehenbizi, txakurrekin batera gauzatzeko lasterketa. Goizeko hamarretan izango da zita, Garondo auzoan. Sei kilometroko luzera izango du ibilbideak, eta inskripzioaren prezioa 12 eurokoa izango da federatuentzat, eta 15 eurokoa federatu gabekoentzat.
12:30ean, aldiz, umeen krosa egingo dute, Iberlandan. Hiru ordu beranduago abiatuko da trail lasterketa, Herriko plazatik. Ibilbide laburra 6 kilometrokoa izango da; eta luzea, aldiz, 16 kilometrokoa. Izen ematearen prezioa 7 eurokoa izango da urriaren 5era arte, eta hortik aurrera 10 eurora igoko da.
Araudia
Kirol proben gaineko argibide ugari eman dituzte antolatzaileek. Proba guztiek "izaera herrikoia" izango dutela nabarmendu dute, "hau da, ez da lizentziarik behar parte hartzeko". Hala ere, ohartarazi dute antolakuntzak ez dituela bere gain hartuko lasterkarien parte hartzearen ondoriozko osasun arazoen erantzunkizuna. Gauzak hala, arduraz jokatzeko deia luzatu diete kirolariei.
Txakurkrosari dagokionez, txakur-arraza guztien parte hartzea onartuko dute, baina hainbat baldintza jarri dituzte horretarako. Zer nolako ekipamendua eraman behar den zehaztu dute, besteak beste.
