Duela bi urte ospatu zen azkenekoz Artziniegako Antzinako Azoka. COVID-19aren pandemia ondoriozko etenaldiaren ostean, ekimenaren edizio berria prestatzeari ekin dio bizilagun talde batek.
Berrituta itzuliko da azoka irailaren 17an, hausnarketa prozesu bat egin baitute egitasmoa birpentsatzeko. Apirilean hasi ziren bilerak egiten, Udalak deituta. Lehen hartu-eman horietatik sortu zen merkatua antolatzeko batzordea, eta talde eragile horrek hartu du bere gain azokaren antolakuntza.
Orain, merkatuan parte hartu nahi duen jendearen bila hasi da batzordea. Horregatik, bizilagunei luzatu diete jaiaren antolakuntzan “edozein modutan” laguntzeko gonbita, “postuak jartzen, animazioa antolatzen edo dekorazioa prestatzen, besteak beste”. Iragan uztailaren 27an egin zuten horretarako bilera, baina posta elektroniko bat ere jarri dute, interesa duen edonoren eskura: antzinako.artziniega@gmail.com.
Duela 25 urte antolatu zuten azoka lehenbiziko aldiz, Artziniega Museoaren ekimenez, eta eragile horre antolatu zituen lehen hiru edizioak. Bolaretxe kuadrillak hartu zuen lekukoa gero, eta ondoren beste hainbat eskutatik igaro da ekimena prestatzearen ardura: Udalak hartu zuen bere gain lehenbizi, ostalari talde batek gero, eta tokiko erakundearen esku geratu zen berriz duela 4 urte.