Udal ordenantza onartzeko izapideak hasi ditu tokiko erakundeak heriotza omenaldiak ospatu ahal izateko. Hala, hileta zibilak edota heriotza omenaldiak egiteko kontsulta publikoa egingo dute Artziniegako Udalaren webgunean. "Lege- edo erregelamendu-proiektua edo -aurreproiektua egin aurretik, kontsulta publiko bat bideratuko da administrazio eskudunaren web-atariaren bidez, eta etorkizuneko arauak uki ditzakeen subjektuen eta antolakunderik ordezkagarrienen iritzia jasoko da", adierazi dute sare sozialetan.
Modu horretan nahi dute erlijio eta kultura aniztasuna bermatu, "muga bakarra ordena publikoa legearen arabera mantentzeko beharrezko dena izango da". Udalaren ustez, ehorztetxe zibilak edo heriotzagatiko omenaldiak egitea ehorzketa duin eta pertsonal baten bidez ehorztetxe erlijiosoei alternatiba bat eskaintzeko gizarte-beharraren ondorio da, eta "Artziniegako Udalak gero eta gehiago eskatzen den gizarte-premia bati erantzun nahi dio".
"Ordenantza honen bidez, beraz, Artziniegako gizarte zibila osatzen duten senideek, lagunek, erakundeek eta/edo entitateek hildakoei egin nahi dizkieten ospakizunak arautu nahi dira, euren pertsona omentzeko edo agurtzeko, euren ekarpen komunitarioak edo balio etikoak edo giza balioak aitortzeko", erantsi dute.
Hargatik, Udalak herritar orori luzatu die ekarpenak egiteko gonbita, info@artziniegakoudala.eus helbidera mezu elektroniko bat bidaliz edota udal bulegoetara bertaratuz, "goiburuan honako hau adierazita: heriotzagatiko hileta zibilak edo omenaldiak baimendu eta egiteko udal-ordenantza arautzailea". Epemuga ere jakinarazi dute: proposamenak jasotzeko epea 2022ko abuztuaren 31n amaituko da.