Bihar abiatuko da Artziniegako X Herri Putxera Lehiaketa, goizeko hamarretan, La Jarrilla Txokoak antolatuta, Udalaren babesarekin. Hiru irabazle egongo dira aurtengo edizioan eta bakoitzak putxera bana jasoko du sari gisa. Behin sariak banatuta, plazan bazkaltzeko aukera izango dute parte-hartzaileek.
Epaimahaiak errezeta tradizional onena sarituko du, hau da, babarrun gorriko putxerak. Tokiko erakundeak arauetan zehaztu bezala, osagaiak hurrengoak izan beharko dira: txorizoa, odolostea, urdaia, txerrikiak, saiheskia eta behi-hegala.
Artziniegan bizi diren herritar guztiek parte hartu ahalko dute norgehiagoka honetan, baita senideek eta lagunek ere. Bertan lehiatzeko, izena eman beharra dago, 11:00ak baino lehen Artekale Plazan.
Tresneria autoz deskargatu nahi izanez gero, ibilgailuak barrutira sartzea baimenduko du Udalak, baina 11:00etan atera beharko dituzte herritarrek.
Aurreko edizioa 2019an izan zen, COVID-19aren pandemiaren aurretik, eta 38 putxera aurkeztu zituzten txapelketara. Egun horretako argazkiak hemen ikusi daitezke.