Gaur bertan abiatu du Udalak Artziniegan Bizi eta Erosi kanpaina, tokiko merkataritza laguntzeko. Orotara 19 saltokik hartuko dute parte ekimenean, eta horietako edozeinetan gastatutako 10 euro bakoitzeko txartel bana eskuratuko dute erosleek. Txartel horiekin 17 sariko zozketa batean parte hartu ahalko dute. Zehazki, Artziniegako dendetan gastatzeko 250 euroko bi bonu eta 100 euroko 15 egongo dira parte hartzaileen eskura.
Gaurtik hasita eta abenduaren 21era arte egongo da parte hartzeko epea. Baldintzak aski errazak dira. Erosleek txartel bana jasoko dute lehiaketan izena emandako saltokietakoren batean gastatutako 10 euro bakoitzeko, hauek amaitu arte. Txartel hori bete eta Artziniegako Udaletxean zein Liburutegian jarritako kutxetan sartu beharko da.
Zozketa abenduaren 28an egingo dute, Udaletxean bertan, 19:00etan. Saria jaso ahal izateko, irabazleek txartelari dagokion erosketa tiketa aurkeztu beharko dute. Horren ondoren, hilabeteko epea izango dute 17 irabazleek saria gastatzeko, 2023ko urtarrilaren 23tik otsailaren 23ra bitarte, hain zuzen ere. Gutxienez, kanpainari atxikitako hiru saltokitan gastatu beharko dute bonua. Kanpainaren inguruko informazio gehiago Artziniegako Udalaren webgunean kontsultatu daiteke.
