Artziniegako azpiegitura berriketetan beste urrats bat eman du tokiko erakundeak. Joseba Vivanco alkateak sare sozialetan azaldu duenez, "Udalak bukatutzat ematen ditu Garai plazako umeen guneko lanak". Ez da izan, ordea, atondu duten eremu bakarra. Izan ere, Artekale plazan zein Axpen ere burutu dituzte hobekuntzak. Gobernuburuak adierazi duenez, orotara, 42.000 euroko gastua eragin du egikaritzeak.
Mota ezberdinetako txirristez gain, lurreko jolas mota eta bestelako jolas tresnak aldatu dituzte. Horrez gain, erabilera egokia sustatzeko informazio panelak ipini dituzte toki horietan. Modu horretan, garbitasuna zein ingurumena errespetatzeko deia zabaldu dute, besteak beste.
Arteko landako azpiegiturak ere berritzen
Bestalde, Arteko zelaiko komunen bigarren konponketa lanak ere bukatu direla jakinarazi du Udalak sare sozialetan. "Komunez gain, tabernako teilatua eta atea ere berritu dira, eta zelaiguneko zuhaitzen informazioa ematen duten panelak jarri ditugu ere", azpimarratu du alkateak sare sozialetan, "hurrengo lege agintaldian definitu beharko da beste etxolen erabilera, euren berriketa eta zelaiko umeen jolas parkearen atonketa".