Artziniegako EH Bilduk trantsizio energetikorantz pausuak ematea galdegin zuen atzo egindako udal osoko bilkuran. Aurkeztutako mozio baten bidez trantsizio hori erdiesteko hainbat neurri proposatu zituen, horien artean nagusiena komunitate energetikoen sorrera bultzatzea.
Hain zuzen ere, EH Bilduk azaldu bezala, Europar Batasunak egindako gomendioa da figura hauek sortzearena. "Next Generation EU funts europarren esparruan, Trantsizio Komunitarioko Bulegoei laguntzak emateko deialdia onartu zen, komunitate energetikoak sustatu eta dinamizatzeko", nabarmendu zuen koalizio abertzaleak.
%50eko hobaria esleituko zaie OHZn energia berriztagarriak dituzten eraikinei
EH Bilduren aldeko botoekin atera zen mozioa aurrera. Horrenbestez, Artziniegako Udalak trantsizio energetikorantz urratsak egin eta komunitate energetikoen sorrera lagunduko du. Halaber, %50eko hobaria esleituko zaie Ondasun Higiezinen gaineko Zergan energia berriztagarriak sortzeko sistemaren bat duten etxebizitza eta eraikinei. Azkenik, Udalak, instalazio publikoen potentzial fotovoltaikoa garatzeko konpromisoa hartu du.