Basoa Fundazioak Basogintzaren iragan, oraina eta geroari buruzko jardunaldiak antolatuko ditu datorren martxoaren 24an Artziniegako Museoan. Hitzordua Basoen Nazioarteko Egunaren Testuinguruan antolatu du Fundazioak. Jardunaldian parte hartzea doakoa izango da, eta aurrez izena eman behar da Internet bidez.
Egungo gizartea basoa kudeatzea zalantzan jartzen ari dela azaldu du fundazio antolatzaileak, eta zenbait galderari erantzuna bilatzen saiatuko dira Artziniegako jardunaldietan: "Baso-kudeaketa jasangarria da? Ezinbestekoa? Komeniko litzateke gutxienez murriztea? Aldatu da? Norantz eboluzionatu beharko luke?"
9:45ean emango diete hasiera jardunaldiei. Lehenik eta behin, Iratiko oihanean kokatutako dokumental bat proiektatuko dute. "Basogintzako praktikak eta egurraren aprobetxamendu eta garraio-prozesuak gogoratzen lagunduko digu filmak", azaldu dute antolatzaileek.
Solasaldia 12:15ean hasiko dute. Bertan parte hartuko dute Maria Menedez basoa ikertzeko INIA-CSIC erakundeko ikertzaileak, Asuncion Camara Oviedoko Unibertsitateko irakasleak eta Alvaro Aunos Lleidako Unibertsitateko irakasleak. Solasaldia Youtube bidez jarraitu ahalko da.
Protestak Amurrion
Basoa Fundazioak beste jardunaldi batzuk antolatu zituen 2021eko martxoan Amurrio Antzokian. Bertan, eukaliptoaren ustiapena izan zuen hizpide Euskadiko Basogintza Elkarteen Konfederakundeak. Besteak beste, Luis Gil gonbidatu zuten, eukaliptoaren alde lerratu den katedraduna.
Uhandre Amurrioko Baso Biziak plataformak elkarretaratzea egin zuen antzokiaren aurrean, eukaliptoaren ustiapena eta basoen industrializazioa salatzeko: