2019an lortu zenuten gehiengo osoa berretsi duzue, zinegotzi bat gehiago lortuta. Zer nolako balorazioa egiten duzue?
Ufa! Oso balorazio ona. Hauteskundeko ekitaldian esan nuen sei zinegotzi lortu behar genituela eta PP udaletik baztertu, eta azkenean karanbola ondo atera zaigu. Sei zinegotziak lortu ditugu eta PP Artziniegatik desagertu da 40 urtez udalean egon ostean.
Duela lau urte baino boto gehiago lortu ditugu, azkenean nik uste herritarrek legealdi honetan egindako lana balioan jarri dutela, eta botoetan isla izan du horrek. Hodei batean gaude!
Babes guzti hau jaso ostean eta , nola heltzen dio EH Bilduk legealdi berriari?
Gu hauteskunde hauek azterketa bat bezala ulertzen genituen. Lau urte egon gara gobernuan, eta orain errebalidara aurkeztu behar ginen. Herritarrek lau urteko lanaren ostean horrelako babesa eman badigute argi dago lana oso ondo egin dugulako dela.
Hauteskunde hauetako gakoa hori zen, hauteskundeak irabaztea gehiengo osoarekin eta EH Bilduren proiektua herrian finkatzea. EAJren 40 urteko udal gobernuen ostean beste egiteko era bat kontsolidatu nahi dugu. Herria egiteko beste modu bat da gurea, eta jendeak horren alde egin du argi eta garbi.
Zer mezu bidali nahi diezu Artziniegako herritarrei?
Lehenik eta behin, nirekin lau urte hauetan egon direnei eskertu nahi diet egindako lana, baita kanpainan lagundu duten herritar guztiei ere. Lan eskerga egin dute!
Azkenik, gugan konfiantza jarri duten herritar guztiei ere eskerrak ematea. Legealdi zaila izan da, akatsak ere egin ditugu, baina euren babesa eman digute datozen lau urte hauetan are hobeto egiteko gure lana.