Ganzorrotz Mendi Taldeak Peñalbako gaueko ibilaldia egingo du gaur. Hain zuzen, 19:30ean Toñin Luengas frontoitik aterako dira eta 12 kilometroko bide zirkularra betetzeari ekingo diote.
2014tik antolatzen dute txangoa, abuztuan etenaldia egin ondoren, ikasturte berria gogoz hasteko. Orain arte esperientzia ona izan da, Andoni Ramirez Ganzorrotzeko presidentea azaldu duenez: "Urtero ez zaigu mendizalerik falta ekimen honetan parte hartzeko, herriko mendizaleak batez ere, baina kanpoko batzuk beti etortzen dira ere".
Irteera jende ororentzat egokia da, gutxieneko eskarmentua izanez gero. Mendi taldeak gomendio berezi bakarra egin du parte hartzaileei begira: "Frontala edo linterna eramatea, jaitsiera gauez egiten baita. Dena den, zeru garbia izatekotan, ilargi betea nahikoa izango litzateke, bide zabaletan zehar ibiliko garelako. Horretaz aparte, txango arrunten aholkuak jarraitzea gomendatzen dugu (Zerbait jateko eta edateko eta arropa eta oinetako egokiak eramatea)".
Ilargi betea, txangoaren osagaia
Ganzorrotz taldeak ibilbidea errepikatu ez ezik, urtero beste elementu bat ere ez du aldatzen; ilargi betea. "Bururatu zitzaigun zerbait ezberdin baina erraza egitea. Gainera, Peñalba mendira askotan igotzen gara urtean zehar eta pentsatu genuen ikuspuntu ezberdina ematea, ilargiaren argitan ibiltzeko helburuarekin. Horregatik, saiatzen gar beti txangoa egitea ilargi betea dagoenenan" argitu du Ramirezek.
Bi mendi txango egiteko aukera
Mendi taldeko kideek beste irteera bat antolatuko dute gaur, Soxoko Jaietan egiten dena.
"Kasualitate hutsa izan da aurten bi txango bultzatzea egun berdinean. Ilargi betea eta Soxoko jaiak bat egin dute. Horregatik, Soxoko 7. Mendi Martxan Ganzorrotz-ek laguntzen du, baina lan gehiena Soxoko Jai Batzordeko kideek egiten dute. Guk bultzatzen dugu ekimena hasieratik, eta Artziegako mendizaleei animatzen dugu parte hartzeko, bai Soxoko Martxan, bai Peñalbara Gaueko Txangoan" adierazi du Andoni Ramirezek.
Soxoko hitzorduari dagokionez, goizeko 9:30etatik aurrera, elizan hasiko eta bukatuko da ibilbidea, 12 kilometrotako luzaerarekin eta 450 metroko desnibelarekin. Beti bezala, izen ematea doakoa izango da.