Putxeren zaleek hitzordu berezia izango dute Artziniegan bihar, La Jarrillak txokoak egiten duen Putxeren Lehiaketaren XI. edizioa izango baita.
Printzipioz, ospakizuna artziniegarrentzat, euren lagunentzat eta senideentzat bideratuta dago eta 10:00etan hasiko da Artekale plazan. Ordu horretatik eta 11:00ak arte tartea izango dute parte hartzaileek deskarga lanak egiteko, ordu horretan amaituko baita izena emateko epea.
Putxerak Artekale eta Goiko plazetan eta Alde Zaharreko beste hiru kaleetan prestatu behar dituzte lehiakideek eta ohiko errezeta jarraitu beharko dute. Hau da, indaba gorria, txorizoa, odolostea eta urdaia izango dira osagaiak derrigorrez. Saiheskia eta behi hegala ere erabili ahalko dituzte, aukeran.
14:00etan aurkeztu beharko dituzte emaitzak eta epaimahaiaren erabakiaren aurka ezingo da helegiterik jarri. Hori bai, iradokizunak jasotzera irekita egongo dira. Lehen hiru sailkatuek putxerak irabaziko dituzte eta sari banaketaren ostean, aukera egongo da norberak bere babarrunak bazkaltzeko Artekale plazan.