Auzo-konpostajerako laugarren gunea instalatu du Aiarako Kuadrillak, Artziniegan. “Gune horiek konpostagailuak eta egituratzailearentzako kutxa bat dituzte, eta hondakin organikoen kudeaketari irtenbide iraunkor eta lokalizatua ematen diote”, azaldu du tokiko erakundeak.
Modu horretan, Artziniegako familiek aukera izango dute euren etxeetako animalia zein landare jatorriko hondakin organikoak konpostatzeko. Kuadrillak jakinarazi duenez, bilera irekia egingo dute laster, ekimenera batu nahi duten bizilagunentzat.
Ildo horretan sakontzen jarraitu nahi du tokiko erakundeak hasi berri den urte honetan, “komunitateko konpostajearen praktika udalerri handienetako auzoetara eta eskualdeko adminsitrazio batzarretara” zabalduz. Horretarako, prestakuntza jardunaldiak eta ikastaro berriak egitea aurreikusi dute 2024an zehar.
Horrez gain, beste gauza bat ere egin nahi du Kuadrillak aurten: edukiontzi marroian txartel bidez sartzeko kontrol-sistema eskualdeko beste eremu batzuetara zabaltzea. Gaur egun, Luiaondon baino ez dago sistema hori instalatuta.
Dena dela, helburu horiek lortzeko, tokiko erakundeak nabarmendu du funtsezkoa izango dela herritarren parte hartzea.
Azken 8 urteetan konpostaje kanpainara batu diren pertsonen %80ak eutsi dio birziklatze sistema honi, Kuadrillak eginiko inkesta baten arabera.
%80ko jarraipena
Aiarako Kuadrillak 2015an ekin zion konpostajea sustatzeari, eskualdeko udalerrietan eginiko ikastaroen bidez. Nabarmendu dutenez, emaitza oparoak izan ditu eginiko lanak: “Duela gutxi, ingurumen-arloko zerbitzu teknikoak jarraipen-deiak egin ditu azken urteetan egindako ikastaroetan parte hartu duten 125 pertsonen lagin batean. Elkarrizketatutako pertsonen % 80k adierazi du etxean konposta egiten jarraitzen duela”. Kuadrillaren ekimenean parte hartzeari utzi diotenek, aldiz, “denbora faltagatik” egin dute, edo beste konpostaje-sistema batzuetan parte hartzera pasa direlako.