Hasi dituzte aurtengo Artziniegako Jaiak prestatzeko lanak. Festak noiz ospatu zehaztea izan da lehen urratsa. Izan ere EAJren udal taldeak proposamena aurkeztu zuen aurrerantzean iraileko lehenengo ostirala izan zedin jaietako lehenengo eguna. Neurri horrekin, ospakizunak abuztuan hastea ekidin nahi zuen talde jeltzaleak. Modu horretan, aurtengo jaiak irailaren 6an hasiko lirateke.
"Proposamen horren aurrean bilera irekia deitzea erabaki genuen, herritarren iritziak jasotzeko", azaldu dio Joseba Vivanco alkateak Aiaraldea Komunikabideari. Auzokideen iritziak entzun ostean, aurtengo jaiak ohiko egutegiarekin mantentzea erabaki du Udal Gobernuak. "Herritarren iritzia izan zen, aurten behintzat, jaien egunak dauden bezala mantentzea. Aurten abuztuaren 30ean hasiko dira jaiak eta irailaren 8an bukatu", adierazi du gobernuburuak, etorkizunean gaia berriro eztabaidatzeari atea itxi gabe.
Jaien antolakuntzan burubelarri
Lehenengo erabakia hartuta, jaien antolakuntzan murgildu dira Artziniegan. Bilera egin zuten aurreko astean, jaien antolakuntzaz arduratuko den lan-taldea osatzeko. "Gure nahia beti izan da herritar talde batek batzorde bat osatzea eta jaien antolakuntzaz arduratzea. Iaz ez genuen lan-talde hori sortzea lortu eta Udalak antolatu zuen jaietako egitaraua, baina hori ez da hobesten dugun eredua", nabarmendu du Vivancok.
Aurten bai, lortu dute komisio hori osatzea, herritar talde txiki bati esker. Talde sortu berriak bere gain hartuko du 2024ko festen antolakuntza, Udal Gobernuaren laguntzarekin.