Julio Medem zinemagile donostiarraren grabaketak aurrera darrai Airaldean. Urduñan otsailean aritu zen sortzailea eta atzo Artziniegaren txanda heldu zen. Hain zuzen, Goiko plazan egon zen lan taldea.
Gaur amaituko dute gaueko ordu txikietan eta grabaketak egiten dituzten bitartean ezingo da trafikorik egon ingurutan. Berez, 15:00etan hastea aurreikusi dute. Goizean zenbait herritar bertaratu dira errodajera eta zuzendariarekin argazkiak egin dituzte. Oso jatorra izan dela ziurtatu dute artziniegarrek.
Pasa den mendean girotua
Trafikoa eteteko arrazoietako bat da pasa den mendeko 1930eko hamarkadan dagoela girotuta filmaren zati bat. Hain zuzen, Ocho pelikulak zortzi sekuentzia planotan kontatuko du emakumezko eta gizonezko baten istorioa 90 urtetan zehar, 1931n hasita.
Antzezle protagonistak Ana Rujas eta Javier Rey izango dira. Rujas La mesías ('Los Javis' sortzaileen azken telesaioan) agertu da protagonismo handiarekin. Reyk, aldiz, Fariña telebista saioko pertsonaia nagusia hartu zuen bere gain.
Ibilbide oparoko zinemagilea
Julio Medem zuzendari berri onenaren Goya saria jaso zuen 1993an, Behiak filmagatik, eta bere hurrengo lanek ere kalitate bikaina izan zuten, erotismoa, surrealismoa eta berezko mundua islatuz. 2003an hautsak harrotu zituen Euskal pilota: larrua harriaren kontra dokumentalarekin.