Horma-irudien I. Lehiaketa antolatu du Artziniegako Udalak, "artearen sustapenean sakontzeko" eta hiribilduko kaleetan barrena ibilbide muralistiko bat sortzeko. Lehiaketaren lehenengo edizioak Garai Plazako erlojuaren dorrea goitik behera apainduko duen irudia aukeratzea izango du helburu.
Maiatzaren 13ra arte dago zabalik lehiaketan izena emateko epea. Epaimahai tekniko batek aztertuko ditu aurkeztutako lan guztiak, eta bozketa fasera eramango ditu proposamen onenak. Hautatutako lan guztiak Udaletxean egongo dira ikusgai maiatzaren 17tik aurrera, eta 16 urtetik gorako Artziniegako herritar orok izango du bozka emateko aukera.
Epaimahaiaren eta herritarren ardura izango da, beraz, Garai Plaza apainduko duen irudia aukeratzea. Horretarako, "proposamen artistikoek inguruarekin duten elkarreragina eta hiribilduko historiari eta tradizioei egindako erreferentziak" baloratu beharko dituzte. Dena ondo bidean, maiatzeko azken astean iragarriko da proiektu irabazlea, eta 5.000 euroko saria jasoko du.
Lehiaketaren oinarrietan jasotakoaren arabera, ekainaren 3tik 21era bitarte margotuko dute Garai Plazako horma-irudi berria, eguraldia lagun baldin badute betiere. Udalak 1.500 euroko aurrekontua prestatu du horretarako. Gauzak hala, ekainaren 22an egitea aurreikusi dute horma-irudiaren aurkezpen publikoa.
Horma-irudiak Artziniegan
Egitasmo honekin ibilbide muralistikoa sortu nahi du Artziniegako Udalak hiribilduan. Honezkero badira herria apaintzen duten zenbait horma-irudi, eta urtez urte bilduma hori handitzea da Udalaren asmoa. Udaletxe zaharreko atarian kokatuta dagoen murala da horren adibide: Velazquezen Bredako errendizioa koadroaren interpretazio librea eginez, herriko hainbat margolarik elkarlanean egindako lana da, eta Artziniegako bizilagunen erretratuak txertatu dituzte bertan.
Artziniegako orain arteko horma-irudirik ezagunenak, ordea, parrokiako gangetako ilustrazioak dira. Zaharberritze ariketa original baten bidez, herriko margolari talde batek antzinako teknikak baliatu zituen Erdi-aroko eszena bilduma atariko gangetan margotzeko. Antzinako elementuak eta objektu anakronikoak nahastu zituzten bertan; hala nola, gazteluak eta telefono mugikorrak.
