Embutidos Arceniega hestekien enpresak atzo iragarri zuen bere jarduera etengo duela ekainaren 30ean. Horrela erabaki zuen akziodunen kontseiluak maiatzaren 21ean.
Aiaraldea Komunikabidea arduradunarekin jarri da harremanetan eta berak azaldu du itxieraren arrazoi nagusia adina izan dela. Hau da, berak enpresaren kudeaketa utziko du eta ez dute topatu norbait ordezkatzeko. Embutidos Arceniegak bost langile ditu gaur egun.
Gauzak horrela, enpresako jabeek aipatu dute prest daudela eskaintzak aztertzeko eta konpainia saltzeko, proposamen interesgarriak eginez gero.
Printzipioz, Embutidos Arceniegak bere jarduera bertan behera utziko du ekainaren 30ean eta ohiko ordutegiak izango ditu egun horretara arte. Hortaz, euren produktuen zaleei gogoratu diete biltegiak betetzeko aukera dutela.
1940an sortuta
Avelina Torre Revillak sortu zuen enpresa 1940an eta geroztik bere errezetek eta hestekiek harrera oso ona izan dute; odolosteek, lukainkek edota saltxitxek, besteak beste. Izan ere, gaur egun kanpoan ere dituzte bezeroak, Artziniegan eta Aiaraldean ez ezik.