Agendan markatzeko kirol-ekitaldi berria izango du aurrerantzean Artziniegak: Soxoguti Erronka. Ganzorrotz Mendi Taldeak antolatu du hitzordu berriaren lehenengo edizioa, eta abenduaren 14an egingo dute; Artziniegako Soxoguti herrian bertan.
Trail lasterketa eta mendi martxa
Udalerriko mendiak eta naturguneak zeharkatuko dituen mendi lasterketa izango da kirol ekitaldiaren muina. Ganzorrotz taldeko kideek 17 kilometroko ibilbidea osatu dute Soxoguti herriko baso eta bideetan barrena. "Zaballa-Ganzorrotz eta Otsati mendietara igoko da, eta hala 900 metro inguruko desnibela metatuko da", azaldu dute antolatzaileek.
Trail lasterketa 10:30ean abiatuko da, baina hori ez da izango kirol-ekitaldiko hitzordu bakarra. Ordu bete lehenago, 9:30ean, mendi martxa hasiko da, trail lasterketaren ibilbide berdina jarraituz.
Egun osoko plana bihurtu nahi dute antolatzaileek Soxoguti Erronka. Horretarako musika, haurrentzako puzgarriak eta jatekoa eskainiko dituzte herrian, baita kirolarientzako aldagela eta dutxak ere.
"Ingurumenarekiko errespetu osoz antolatu nahi dugu lasterketa, Artziniega gure herria eta bertako naturguneak ezagutzera emateko helburuarekin", aldarrikatu dute Ganzorrotzeko kideek. Ohar bat ere utzi diete parte-hartzaileei: "Lokatza gorroto baduzu... ez etorri!!!".
Izen ematea zabalik
Honezkero zabalik dago Soxoguti Erronkan izena emateko epea. Dortsala Internet bidez eskuratu ahalko da, helbide honetan. Azaroaren 25era arte 15 euroko prezioa izango dute izen-emateek, eta egun horretatik aurrera 20 eurokoa.
Dortsalarekin batera kamiseta bana jasoko du parte hartzaile bakoitzak. Aurretiaz ere eros daiteke eslastikoa, helbide honetan.