Xaboigileak izango dira gonbidatu bereziak igandean Artziniegako Museo Bizian

Erredakzioa 2025eko martxoaren 13a

2014ko Museo Biziaren edizioko irudi bat. / Aiaraldea.eus

Antzinako ogibideak erakutsiko dituzte eta, horrez gain, Hozffer Ana lantegiaren erakusketa ikusteko azken eguna izango da.

Museo Bizia jardueraren edizio berria egingo dute Artziniega Museoan igande honetan 11:00etatik aurrera. Ordu laurdenero bisitari taldeak sartuko dira eraikinean eta antzinako hamaika ogibide ikusteko aukera izango dute.

Hain zuzen, gela bakoitzak ofizio bana hartuko du eta jardunean ari direnek azalduko dute nola egiten zen zeregin bakoitza. Joskinak, botikariak, zapatariak, dendariak, udal langileak, errementariak... lanbide anitzak egongo dira ikusgai.

Aurtengo bizibide berezia xaboigileena izango da. Hain zuzen, museoa harremanetan jarri da Gaude Mendiondo elkarteko kideekin, eta eurek azalduko dute nola egiten duten garbitzeko ezinbesteko produktu hori.

Aipatu beharra dago elkarteak aniztasun funtzionala duten lagunekin egiten duela lan. Artziniega Museoaren aburuz, taldea osatzen dutenek leku aproposa izango dute euren jarduna nolakoa den argitzeko.

Kultura Artziniega

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.

Izan bazkide