Arabako Foru Aldundiak gaur bertan zabaldu du bertan behera utziko duela Daorje enpresarekin duen kontratua, paper eta kartoi bilketa egiteari utz diezaion. Foru erakundeak berak argitu du konpainia horren eta Garbialdiren arteko akordioa dagoela, azken horrek bete ditzan ardurak.
Aldundiak aipatu du hurrengo asteetan gauzatuko dutela aldaketa eta horrek zerbitzuaren kudeaketari atxikitako baldintza teknikoak betetzea ekarriko duela. "Papera eta kartoia behar bezala jasotzeaz gain, baliabide material berriak jarri beharko dituzte eskura, hau da, edukiontziak eta kamioiak", adierazi dute.
Zigorrak eta fakturak
Halaber, foru erakundeak erantsi du hainbat zigor espediente ireki dizkiotela Daojeri eta fakturak erregularizatu behar izan dituztela, ez zelako zerbitzua eman.
Zerbitzuaren arazoaren iturburua lan baldintzak izan dira. Hain zuzen, langileak denbora luzez egon dira egunero hamar orduko lanaldiak egiten eginkizun guztiak betetzeko, baina iaz erabaki zuten zortzi ordu baino gehiago ez egitea eta Daorjeri exijitu zioten jende gehiago kontratatzea.
Foru erakundeak erantsi du hainbat zigor espediente ireki dizkiotela Daojeri eta fakturak erregularizatu behar izan dituztela, ez zelako zerbitzua eman.
Kuadrillei eta Udalei eskerrak
Saray Zarate Ekonomia Garapenaren eta Jasangarritasunaren Saileko diputatuak eskerrak eman dizkie Kuadrillei eta Udalei, "hilabete hauetan emandako laguntzagatik, funtsezkoa izan baita papera eta kartoia biltzeko gutxieneko zerbitzuei eusteko".
Artziniegako Udala, bereziki haserre
Artziniegako Udala nekatuta eta nazkatuta dago paper eta kartoi bilketa zerbitzuak eragiten dituen gatazkekin. Izan ere, Joseba Vivanco alkateak azaldu duenez, "hondakinak jaso gabe geratzen dira eta horrek herritarren kexak sortzen ditu, naturala denez, zergak ordaintzen baitituzte".
Vivancok aipatu du arazoa bereziki larria dela zenbait urbanizaziotan, zeintzuek kartoi eta paper hondakin kopurua handia sortzen duten: "Teorian ostegunero biltzen dira papera eta kartoia, baina ez da beti gertatzen. Batzutan udalok eta Aiarako Kuadrillak esku hartzen dugu arazoa arintzeko, baina hori ez da konponbidea, ezin diogu lana egin enpresari".
Langileak denbora luzez egon dira egunero hamar orduko lanaldiak egiten eginkizun guztiak betetzeko, baina iaz erabaki zuten zortzi ordu baino gehiago ez egitea eta Daorjeri exijitu zioten jende gehiago kontratatzea.
Aiaraldeko Kuadrilla osoan
Artziniegako alkateak azpimarratu du bere herriko egoera ez dela apartekoa eta Araba zein eskualdeko udalerri arabar guztietan gertatzen dela. "Luiaondon edota Amurrion ere egoera antzekoa da", esan du ordezkariak.
Bide batez, Vivancok gogoratu du Europar irizpideak betetzeko udal guztiek onartu behar izan dutela hondakinen bilketaren zerbitzuko zergen garestitzea, ezin baitira defizitarioak izan. Ondorioz, zerbitzu eskasak eskaintzeak hainbat herritar haserretu ditu, alkatearen esanetan.