48 orduz egongo da itxita, gutxienez, Artziniegako udal igerilekuetako igerileku handia. Izan ere, bart gauean, ezezagun talde bat azpiegitura publikoetan sartu da eta kalte larriak eragin ditu bertan. Artziniegako Udalak Aiaraldea Komunikabideari jakinarazi dionez igerilekuko material ugari hondatu eta uretara jaurti dute.
Egoera konpontzeko lanetan da orain tokiko gobernua. Joseba Vivanco alkateak azaldu duenez bi egun beharko dituzte igerilekua berriro ere funtzionamenduan jartzeko. Udaletik gogor gaitzetsi dituzte "udalerriari ahalik eta kalterik txarrena eragitea baino bilatzen ez duten jokabideak".
Segurtasun-kameren instalazioa eskatu du EAJk
Artziniegako EAJk ere kezka adierazi du gertatutakoaren aurrean. "Gertatutakoak biziki kezkatzen gaitu. Eraso arduragabeak uraren kalitatea arriskuan jartzeaz gain, ehunka herritar bero boladan igerilekuez gozatu ezinik utz ditzake", adierazi du Encina Castresana jeltzaleak.
Egoera hauek saihesteko prebentzio-sistemen beharra azpimarratu du oposizioko alderdiak, eta gogorarazi du kiroldegian, eskolan eta igerilekuetan segurtasun-kamerak jartzea eskatu zuela bere garaian. "Kamera horiek instalatuta egongo balira, agian gaur errudunen atxiloketaz hitz egingo genuke, eta ez instalazioen aldi baterako itxieraz", azpimarratu du Castresanak.
