Azken egunetan Artziniegako eremu publikotan bi aldiz agertu dira margoketak zenbait eraso matxista salatzeko. Udal langileek mezu horiek ezabatu dituzte eta herriko talde feministak salatu du hori egiteak ez duela estaltzen "atzean dauden bizipenak eta sufrimendua".
"Badakigu emakume eta neska gazte askok (adingabe batzuek) jazarpen egoerak bizi izan dituztela gure inguruan, eta premiazkoa da benetako neurriak hartzea haien segurtasuna eta indarkeriarik gabe bizitzeko eskubidea bermatzeko", adierazi du taldeak sare sozialetan.
Gauzak horrela, erakundeei inplikazioa eskatu diete biktimen alboan egoteko.
Bilera Udalarekin
Kolektibo feministaren eskaerari erantzunda, Artziniegako Udalak bilera egitea proposatu dio taldeari. Udalak berak aipatu dio Aiaraldea Komunikabideari euren asmoa dela gaia konpontzea elkarrizketaren bitartez. Halaber, tokiko erakundeak zehaztu du oraindik ez dutela batzarraren eguna eta ordua finkatu, baina espero dutela hurrengo egunetan izatea.
Momentuz, Talde Feministak ez du adierazpen gehiagorik egingo, ez baitu aukerarik izan azken egunean elkartzeko.
EAJren oharra
Atzo bertan Artziniegako EAJk oharra plazaratu zuen herriko kolektibo feministarekin lerratzeko eta erabateko kezka eta gaitzespena adierazi du udalerrian gertatutako edozein sexu-eraso edo indarkeria matxistaren aurrean.
"Talde jeltzaleak azpimarratu du erabateko babesa ematen diela biktimei eta haien senideei, baita indarkeria mota horren eraginpean egon daitezkeen pertsona guztiei ere", aipatu dute.
"Horregatik, Talde Feministaren eta gure udalerrian berdintasunaren eta indarkeria matxistaren prebentzioaren alde lan egiten duten erakunde guztien lana babesten dugu", gaineratu du Encina Castresana bozeramaileak.