Artziniegako EAJk prentsa oharra zabaldu du jakinarazteko zein ekimen eramango dituen hurrengo udalbatzara. Egitasmo nagusia mozio bidez jaso dute, eskatzeko Udalari bedel baten lanpostua sor dezan, lanaldi osoan edo erdian. Oposizioko taldeak uste du langile horrek aukera emango lukela zuzendaritza-taldeari zereginak kentzeko eta ikastetxearen eguneroko funtzionamendua hobetzeko.
Horrez gain, hainbat galdera egingo ditu Encina Castresana bozeramaileak. Hasteko, interesa agertuko dute Artziniegan helduentzako hizkuntza-prestakuntzako hezkuntza-zerbitzu bat ezartzeko eman diren urratsen inguruan.
Bestalde, jaietan Puntu Morean erregistratutako datuak ezagutzea ere eskatuko dute, indarkeria matxistaren aurkako borrokan duten eragina eta erabilgarritasuna baloratu ahal izateko.
Azkenik, publizitate instituzionalari buruzko informazioa ere exijituko dute, jakiteko zer irizpide, baldintza eta onuradun dituen udal-baliabide horrek.
Encina Castresanak leporatu dio EH Bilduko udal gobernu taldeari gehiegi luzatzea erantzunak emateko orduan eta, ondorioz, arintasuna eskatu dio.