356.250 euro inbertituko ditu Arabako Foru Aldundiak Artziniegako Valle Etxea erosteko. Udalak eskatu zion laguntza hori Araba(n) Bizi Bedi programaren bitartez. Erakundeen asmoa da Artekale 16an kokatutako eraikin hori alokairu sozialeko zortzi etxebizitzatarako baliatzea.
2026an ekingo diote erosketa egikaritzeari eta gero Artziniegako Udalak dirulaguntza gehiago eskatuko ditu higiezina berritzeko.
Guztira, Aldundiak 853.228,66 gastua onartu du gaur, toki hauetara ere bideratu baitute dirua: Donemiliaga (120.000,00 €), Gaubea (103.597,96 €), Guardia (85.850,00 €), Agurain (99.404,85 €), Bastida (26.775,85 €) eta Bilar (61.350,00 €).
Artziniegako Udalak honakoa adierazi du eskuratutako babes ekonomikoari buruz: "Etxebizitza eskuratzearekin gaur egun dagoen arazo handia dela eta, urrats hori Udalak etxebizitzaren arloan inoiz egin ez duen apustua da, eta datozen hilabeteetan Eusko Jaurlaritzarekin udal-lurzoruan etxebizitza publiko gehiago egiteko akordio batekin osatzea espero da. Udalerrian etxebizitza publikoak sustatzeko Artziniegan egiten diren lehen urrats garrantzitsuak dira, egungo eskariari erantzuna emateko eta udalerriko gazteek beren independentziarako lehen urratsean etxebizitza prezio merkeetan eskuratu ahal izateko".
Halaber, EH Bilduko udal gobernu taldeak balioan jarri du Araba(n) Bizi Bedi programa koalizioaren ideia dela eta EAJ eta PSE-EErekin adostu zuela 2025eko aurrekontuetan sartzea.