Lehen sektoreko hainbat langilek mobilizazioa egin zuten ostiral arratsaldean Artziniegan. Hain zuzen, 20-25 bat traktore eta gidari elkartu ziren, landa eremua ez dagoela salgai aldarrikatzeko. 16:00etan izan da hitzordua, eta traktoredun emakume zein gizonek eskakizun komunak mahaigaineratu dituzte.
"Beste toki batzuetan egiten ari diren mobilizazioak babestu nahi ditugu, Gasteiz urruti geratzen baizaigu", adierazi zion Ander Bergara Gotxik Aiaraldea Komunikabideari. Artziniega hautatu zuten elkartzeko gune, eta igerilekuetatik abiatu ziren Aiaraldeko zein Gorobel mendilerroaren bestaldeko (Burgos, Espainia) nekazariak, errepideetara salaketa eramateko. "Quincoceseko zein periferietako lagunak elkartu gara, 25-30 pertsona inguru", erantsi zuen Bergara Gotxik.
Honakoa ez da lehen sektorea herriguneetara eramaten duten lehen aldia: "Duela 3 urte antzerako traktorada egin genuen, Artziniega blokeatu genuen. Gaur Artziniegatik Soduperako joan-etorria egingo dugu, Mercosurren kontuarekin sektorea hiltzera baitoa". Modu horretan kritikatu dituzte Mercosur eta Europar Batasunaren arteko akordioaren ondorio kaltegarriak. Izan ere, salatu dutenez, 2028. urtean ezarri nahi dituzten politikek %20 murriztuko dute PAC deiturikoa, Abeltzainen Politika Komuna, alegia.
Aurrera begira, urtarrilaren 29an beste ekimen bat gauzatzea dute buruan, "Aiaraldean eta toki guztietan egingo dena". Bergara Gotxik zehaztu duenez, bailaran ere izango du eragina: "espero dugu eskualdean ere antolatzea".