Artziniegako EAJko udal taldeak mozioa defendatuko du hurrengo udalbatzan hondakinen tasak %15eko hobariak ezarri daitezen. Horretarako Hiri Hondakin Solidoak Biltzeko Tasen Ordenantzan pizgarriak ezartzea proposatu du.
Zehazki, euren ideia da hobariak ezartzea pertsona bakarraren edo biren etxebizitzetarako —65 urtetik gorako pertsona bat bizi denekoak barne— eta guraso bakarreko familietarako, baita familia ugarientzat edo egoera zaurgarrian daudenentzat ere.
Halaber, %15eko hobaria proposatu dute etxeko edo komunitateko konpostajearekin bat egiten dutenentzat, eta %10ekoa paper-kartoizko atez ateko bilketa-sistemari atxikitako saltokientzat edo hondakin organikorik sortzen ez dutenentzat.
Konpostajerako bigarren gunea
Oposizioko taldearen aburuz, bigarren konpostaje komunitarioko gunearen irekiera une egokiena da egitasmoa abiatzeko eta hondakinen kopurua murrizteko. Izan ere, gogoratu dute edukiontzi grisean bukatzen duten hondakinen erdiak organikoak direla eta kopurua murrizteko ezinbestekoa dela konpostajea sustatzea.
"Ingurumen-onurak agerikoak dira, baina ekonomikoak ere bai. Edukiontzi griseko zaborraren erdia organikoa bada, behar bezala birziklatzeak aurreztea dakar udalerriarentzat eta, beraz, guztiontzat", azpimarratu du Encina Castresana bozeramaile jeltzaleak.
Euren aburuz, helburu horiek betetzeko beharrezkoak izango dira kanpaina eraginkorrak, tailerrak, hitzaldiak eta bestelako ekintzak barne.