Maiatzeko Udal Osoko Bilkuran onartu zen Artziniegako Hirigune Historikoan trafikoa arautzeko ordenantza berria. Araudi berria Arabako Aldizkari Historikoan argitaratu bezain laster sartuko da indarrean, eta kamerak jarriko dituzte matrikulak irakurtzeko, gaur egun dauden piboteak kenduta.
Tokiko erakundeak zehaztu duenez, hamaika alegazio aurkeztu ziren orotara. Horietako sei hartu dituzte aintzat behin betiko ordenantzan, bat partzialki gehitu dute eta beste lau ez dituzte onartu.
Araudi berriak ordutegi finkoak ezartzen ditu baimendu gabeko ibilgailuak Alde Zaharrean sar daitezen. 7:00etatik 15:30etara sartu ahalko dira astelehenetik ostiralera eta 7:00etatik 14:00etara larunbatean.
Azaldu dutenez, igande eta jaiegunetan ezingo dira sartu. Dena den, arratsaldez eta gauez ere izango dute aukera, 15:30etatik 7:00etara, baina ordu erdiz gehienez. Hain zuzen, horretarako jarri nahi dituzte kamerak, denbora hori kontrolatzeko.
Udalak defendatu du kamaren sistema piboteena baino egokiagoa dela, oztopo fisiko horiek “sekulako eragozpenak eta istripuak” eragin dituztelako.
Arkaitz San Josek luze eta zabal hitz egin zuen gaiari buruz Aiaraldea Komunikabidearen Azalera podcastean. Zinegotziaren aburuz, “ezjakintasun eta larritasun handia” dago gaiarekiko, eta eztabaida ugari nahasten dira.
Udal ordezkariak defendatu du kamaren sistema piboteena baino egokiagoa dela, oztopo fisiko horiek “sekulako eragozpenak eta istripuak” eragin dituztelako, eta gero nahasmen handia egon izan delako aseguruekin, gidariak Alde Zaharrean modu egokian sartu zen edo ez aztertu behar zelako.
San Joseren ustez, badaude Alde Zaharrean “sartze hutsagatik” sartzen diren autoak, eta hori da ordenantza berriarekin ekidin nahi izan dute, pertsona batzuek “oso gaizki” aparkatzen dutela nabarmenduta. “Ez dugu udaltzainik. Eskumen horiek Ertzaintzarenak dira eta normalean ez du isunik jartzen, baina Udalak ere badu horretarako gaitasuna”, azaldu du zinegotziak.
Gauzak hala, San Jose ziur dago neurri berria merkataritzaren mesederako izango dela, Artziniegako Enpresa eta Merkataritza Elkarteak aurkako iritzia plazaratu zuen arren urte hasieran, oraindik alegazioak aurkeztu eta onartu gabe zeudenean.
Oposizioaren kritikak
Ordenantzaren aurka bozkatu zuen EAJk udalabatzan, eta oharra plazaratu du bere jarrera azaltzeko. Oposizioko taldeak uste du araudi berriak "kalte larria" eragin ahal diola "merkataritzari, ostalaritzari eta eguneroko bizimoduari".
Jeltzaleen arabera, "diagnostiko oker batetik" abiatzen da neurria, eta agerian uzten du "egungo udal gobernuaren planifikazio eta adostasun falta".
Ordenantzari buruzko herri galdeketa egitea planteatu du EAJk.
EAJk argudiatu du udalerriko mugikortasun arazoa ez dela igarotze-trafikoa, "bizilagunentzako eta bisitarientzako aparkaleku eta alternatiba errealen falta" baizik.
Horri lotuta, nabarmendu du EH bilduk zortzi urte daramatzala Artziniegan gobernatzen, "disuasio-aparkaleku bakar bat sortu gabe eta udalerrirako mugikortasun plan integral bat aurkeztu gabe".
Gauzak hala, debekatzera mugatzea leporatu diote jeltzaleek udal gobernuari, "eredu integral eta adostu bat" behar dela iritzita. Ordenantzari buruzko herri galdeketa egitea planteatu diote udal gobernuari.
Prentsa ohar bera baliatu du EAJk Dirulaguntzen Plan Estrategiko baten beharra mahai gainean jartzeko.
Azaldu dutenez, Herri Kontuen Euskal Epaitegiak horri lotutako ohartarazpen bat bidali dio Udalari. "Dirulaguntzen Plan Estrategikoa ez da izapide burokratiko hutsa. Funts publikoen banaketan gardentasuna, norgehiagoka eta segurtasun juridikoa bermatzeko ezinbesteko tresna da", argudiatu du Encina Castresana bozeramaile jeltzaleak.