Film labur bateko plato bilakatuko da Artziniega datozen egunetan. Izan ere, Elizaveta Okulova kazetari eta gidoilariaren proiektu berria herrian girotuko da. Seme baten galera tragikoa izango du ardatz ikus-entzunezkoak, eta filmazioan parte hartu nahi duten pertsonen bila ari da ekoiztetxea.
Zehazki, bi profileko herritarrak behar dituzte. Alde batetik, 65 urtetik gorako 6-7 pertsona behar dituzte, figurante lanak egiteko. Eszena labur batean parte hartuko dute horiek, eta hilaren 29an grabatuko dute, gutxi gorabehera 14:30-16:00 bitartean, harategian. Parte hartzaileek ez dute zertan aurretiko esperientziarik izan behar.
Horrez gain, 20-30 urte bitarteko neska eta mutil bana ere ari dira bilatzen, bikote bat antzezteko. Paperek elkarrizketa izango dute eta beharrezkoa izango da adierazkortasuna, hortaz, kamara aurrean edo eszenatoki gainean esperientzia izatea baloratuko da. Kasu honetan, ekainaren 28an filmatuko dira eszenak, 17:30etik aurrera, baina ordutegia moldatu daiteke.
Interesa duten herritarrek Elizaveta Okulovarekin jar daitezke harremanetan zuzenean, 680 239 745 telefonoan.