Denboran salto egin eta iraganera bidaiatzeko parada ematen du Artziniegako Antzinako Azokak urtero. Aurten ere ez du hutsik egingo eta irailaren 19an Erdi Aroko giroan sakonki murgilduko dira hiribilduko kale eta kantoiak.
Egitarau osoari azken ukituak ematearen faltan, zenbait kontu aurreratu dituzte dagoeneko antolatzaileek, gogoa pizten joan dadin: "Inguruko artisauek eta ekoizleek, urrunetik datozen merkatariekin bat egingo dute Azoka honetan haien produktu hoberenak eskaintzeko: goxoak, arropak, bitxiak, janaria… eta hainbat eta hainbat kuriositate eskuratzeko aukera izango dugu, beti bezala artisau landuen eskutik".
Orotara ehun postu baino gehiago egongo direla azaldu dute eta kale animazioa ere ugaria izango da: juglareak, izaki fantastikoak, hango eta hemengo musikari eta dantzak, eta adin guztietarako ikuskizunak egongo dira egun osoan, Erdi Arorako denbora-bidaia hori girotzen.
Bide horretan, esperientzia are murgilgarriagoa izan dadin okasiorako janzteko gonbita egin ohi diete antolatzaileek herritarrei.
Ekimen herritarra
Ibilbide luzea eta aitzindaria da Artziniegako Antzinako Azokarena, 1998. urtean estreinatu zen, eta herrian harro dioten bezala, mota honetako Euskadiko lehena da.
Hogeita zazpi urte hauetan, esku eta buru ezberdinetatik igaro da Azoka antolatzeko ardura: Artziniega Museoak izan zuen lehenbiziko hiru urteetan, Bolaretxe kuadrillak hartu zuen ondoren, eta Udala eta ostalari talde bat ere aritu izan dira prestaketa lanetan, etapa ezberdinetan.
Gaur egun, ordea, 2022an abiatutako hausnarketa prozesuaren ondoren, "lantalde herrikoi" batek antolatzen du iraileko Azoka. Urtean zehar hainbat bilera egiten dituzte horretarako, eta Artzininiegako Udalaren eta La Villa, Ostargi-Koba, Batzoki eta Pirineum tabernen laguntza ere badute.
Kolaboratzaile eta boluntarioen elkarlana, dena den, beharrezkoa dute egun handi hau hasieratik amaierara arte aurrera atera dadin. Peio Ureta Ofizialdegi da laguntzaile horietako bat: 3D Artista da bera eta Azokaren kartela diseinatu du azken hiru ediziotan.
Honako hau da aurtengoa:
