Arciniega abizena eta bere deribatuak dituzten pertsonek hitzordu garrantzitsua izango dute 2027ko uztailaren 10ean, nazioarteko bigarren topaketa egingo baitute deituraren jatorrizko herrian.
2022an antolatu zuten lehenbizikoz ekimen hori, hiribilduaren 750. urteurrenaren ospakizunen egitarauaren barruan, eta leku ezberdinetatik etorritako 200 pertsonatik inguru elkartu ziren. Lehenengo ediziotik bost urtera, beste topaketa bat antolatu du Udalak, eta egun hartan egon ahal izan zirenak zein errepikatuko dutenak gonbidatu ditu.
Datarako oraindik urtebete geratzen den arren, ospakizunerako eguna jakinarazi nahi izan dute, Arciniegatarrek haien egutegian gorriz markatu dezaten. Tokiko erakundeak azaldu duenez, ordea, 2027ko martxora arte ez dute izen-ematea irekiko. Dena den, jardunaldiaren inguruko zalantzarik dutenek, hala nola ostatua non hartu, zer bisitatu, nola heldu, eta abar, encuentroarciniega@gmail.com helbidearen bitartez argitu ditzakete.
Aurreratu dutenez, egun horretan herri-bazkaria eta Artziniegara bisitak egongo dira, eta noski, deitura bera duten beste pertsona batzuk ezagutzeko edo haiekin berriz ere elkartzeko aukera.
Munduko Artziniegatarrak
2020ko Espainiako Estatitiska Institutuaren datuen arabera, 362 biztanlek dute Arciniega lehen deitura estatuan, eta 396k bigarrena. Amerikan, ordea, asko dira abizen hori eta hortik eratorritakoa duten herritarrak, batez ere Mexikon.
Legatua zabaldu dutenen artean Claudio de Arciniega (1526-1592) arkitektoa egon zen. Hemen jaioa, Mexikora joan eta bertan ospe handia izan zuen, berak egin baitzuen Mexiko Hiriko kapitalaren proiektua.
