Udan jarri du ikusgai Teresa Lafraguak Nostalgia baten esnatzea erakusketa Santxotena Museoan, zeinean ehunka eta ehunka panpin batu dituen. Barbieak, Nanciak, beste herrialdetako eta garai ugaritako jostailuak elkartu ditu eta horren bitartez azaldu du nola eraldatu den gizartea.
Izan ere, Lafraguaren iritziz, arrazismoak, modak edota homofobiak zeharkatzen dituzte panpinak. Horrela, dibertsitate funtzionala, inklusioa, arrazakeria, homofobia, genero-rolen aldaketak, moda edo fabrikazio-materialak bezalako gaiak ikuspegi historiko eta sozial batetik lantzen dituzte.
Gizartetik harago, panpinak norbanakoekin ere jartzen dira harremanetan eta saiatzen dira norberaren oroitzapenak eta emozioak pizten, nostalgiarako zubia jarrita.
Ekonomia zirkularra
Antolatzaileek azpimarratu nahi izan dute, bestalde, ekonomia zirkularraren eta jasangarritasunaren balioa. Erakusgai dauden piezen %99,9 jolaserako erabiliak izan dira eta urteetan zehar zaindu eta gorde dira; gauza bera gertatzen da erakusketako dekorazio-elementu gehienekin ere.
Horrek agerian uzten du historiadun objektuak berrerabili, zaindu eta belaunaldiz belaunaldi transmititzearen garrantzia.
Argazkiak: Santxotena Museoa