Iragan abenduan aurkeztu zuten Artziniegako Euskaltzaleon Foroa, herrian bizitza euskaraz egiteko topalekuak sustatzeko helburuarekin. Ordutik hona hainbat jarduera egin dituzte, eta bultzada berria eman nahi diote orain egitasmoari. Batzar irekia deitu dute horretarako ostiral honetan, arratsaldeko seietan Kultur Etxean.
“Egindakoaren balorazioa egin nahi dugu, eta uda ostean berriz ere martxan jarri, apur bat geldirik egon delako kontua”, azaldu diote Foroko kideek Aiaraldea Komunikabideari. Sorreran zehaztutako helburuari heldu nahi diote berriz: hilero euskarazko jarduerak egitea, herriko euskaldunak harremanetan jarri eta sarea sortu, eta modu horretan, “euskaraz egiteko espazioak egon daitezen, jendea ahaldundu eta hizkuntza ohituretan eragiteko”.
Euskararen Egunari so
Euskararen Egunari begira ere jarriko dira biharko bileran. Izan ere, hasi dira programazioa zirriborratzen Udaleko euskara zerbitzuarekin batera. Hori konpartitu nahi dute batzarrean, ekarpenak jasotzeko elkarte zein herritarren partetik.
