Artziniegan umeentzako futbol 8 taldea sortu dute. Berez, aurreko denboraldian ekin zioten entrenatzeari, baina aurten urrats bat harago eraman dute proiektua eta eskola kirolan lehiatzeara igaro dira.
Horrek aldaketa handia eragin du herria eta ende desberdina helburu beraren inguruan elkartzea ekarri du: "Hor daude gertakariak: amatxu asko jarri dira buru-belarri lanean, benetako klub baten antza ahalik eta gehien izan dezagun", aipatu dute klubeko kideek.
Amek egindako ahaleginak emaitzak ekarri ditu: "Kalera atera dira eta alde guztietatik laguntza bilatu dute. Bai udalak, bai beste eragile batzuek ere proiektu honen aldeko apustua egin dute, eta egunetik egunera gero eta gehiago ari dira batzen".
Taldea guraso batzuek sustatu zuten hasieran, bere semeak beste herri batzuetara joan behar baitziren kirola egiteko. Gainera, ez ohiko balioekin kutsatu dute proiektua. Futbolean maiz gailentzen diren ideien eta praktiken ordez, Artziniegan taldea sentimendua eta ezberdinekiko errespetua bultzatzen dute lehenik eta behin.
Izan ere, ekimenak ez du irabazteko anbiziorik, baizik eta umeak protagonista izatea eta ilusioz bizitzea kirola.
Hori, taldearen aburuz, herrian nabaritzen da eta horren adibide da larunbatean egindako herri bazkaria, kluba finantzatzeko.