Urtebete "Aiara dantzan, aunitz urtez!" estreinatu zenetik

Urtebete pasa da iazko azaroaren 29 eta 30ean 140 dantzari eta musikari baino gehiago Amurrio Antzokiko agertokira igo zirenetik, "Aiara dantzan, aunitz urtez" ikuskizuna oholtzaratzea. Urtea pasata, Aiaraldeak grabatutako bideoa publikatzea erabaki du taldeak, nahi duenak berriro goza dezan.

30. urteurrena

Dantzaldia taldearen 30. urteurrena zela eta egin zuen Aiara Dantza Taldeak, eta bertan, 30. hamarkadatik gaur egunera arte Amurrio eta inguruetako dantzaren egoera kontatu zuten:

30. HAMARKADA

Dantza talde ezberdinak egon ziren 30. hamarkadan Amurrio inguruetan, Larrinbe, Amurrioko Batzokiko edo Baranbioko taldeak esaterako. Azken honen sortzailea izan zen José Tomás Uruñuela konpositorea. Gasteizen sortua bazen ere, Baranbion eman zituen bere bizitzako hainbat urte. Uruñuelarena da gaur egun ere askotan dantzatzen dugun Kontrapasaren musika ere.

FRANKISMOA

1936. urtea iritsi eta Francok estatu kolpea eman zuen Espainian. Gerra bizi behar izan genuen hemen ere, eta hamaika desagertu, hildako eta zauritu ekarri zituen horrek. Honekin batera errepresioa heldu zen: euskal nortasuna zapaldu eta ikurrak debekatu zituzten. Ondoren sortuko zen Dantza Lagunak dantza taldeak ere bizi behar izan zituen errepresioaren ondorioak.

TRANTSIZIOA

Frankismo ondorengo garaia ere gogorra egin zitzaigun euskaldunoi. Ipar Euskal Herrian ordea bestelakoa zen egoera, euskal nortasuna ez baitzen hain zapaldua izan. Handik ekarri zituzten askok Hego Euskal Herrian debekatutako hainbat gauza: Ez Dok Amairu musika taldearen biniloak edo ikurrinak esaterako.

GAUR EGUNA

Azken eszena gaur egunean oinarrituko da. Aiara Dantza Taldearen oraina zein den ikusiko dugu, baita Euskal Herrian dugun dantza aberastasuna ere.
Izan zirelako gara, garelako izango dira!”