Aiarako Kuadrillako eskualdeko (Laudio, Amurrio, Aiara, Artziniega eta Okondo) eta Bizkaiko Urduñako enplegu-plana beste urte batez berraktibatu da. Zehazki, programaren helburua da guztira 28 pertsona kontratatzea sei hilabetez, 26 lanaldi osoan eta 2 lanaldiaren %60an.
Plana LANBIDE-Euskal Enplegu Zerbitzuak eskatutako baldintzak betetzen dituzten langabeentzat da, maiatzaren 18ko ebazpenaren arabera. Udalerri bakoitzean, gainera, profil ezberdinak kontratatuko dira.
“Iragarkiak Lanbiden argitaratuko dira azaroaren 20tik aurrera, eta interesatuak soilik LANBIDEren bitartez eman ahal izango dute izena abenduaren 4era arte, beraz, beharrezkoa da Lanbideren web-zerbitzua erabiltzea”, adierazi du Aiarako Kuadrillako lehendakaria den Encina Castresanak. Halaber, “kontratazioak abenduaren 31 baino lehen egingo direla” adierazi du.
Aurten, baita ere, kontrataziorako laguntzen deialdia egingo da enpresentzat. Laguntza horien oinarriak abenduan argitaratuko dira ALHAOn, eta Kuadrillaren web gunean eskuratu ahal izango dira. Aurreikusitako zenbatekoa 42.200,00 €-koa da.
Azkenik, adierazi behar da planen kostu osoa 650.000,00 €-tik gorakoa izango dela, eta horren %65 inguru LANBIDE – Euskal Enplegu Zerbitzuak finantzatuko duela.