Aiaraldeko Kuadrillak beste urte batez bat egin du errefuxiatuekiko elkartasunarekin, Arroz Bilketa Kanpainaren bidez. Ekimen hori otsailaren 4tik (asteartea) 7ra (larunbata) bitartean garatuko da Laudio/Llodio, Amurrio, Aiara/Ayala, Artziniega eta Okondo udalerrietan, Zaporeak elkartearekin lankidetzan.
Zaporeak irabazi-asmorik gabeko elkartea da, eta elkartasuna eta gastronomia uztartzen ditu Europara iristen diren errefuxiatuei janari duina eskaintzeko, bereziki Greziako errefuxiatu-esparruetan, Lesbosen kasu, harrapatuta geratzen direnei. Proiektua 2012an sortu zen, Intxaurrondoko Talde Gastronomikoak bultzatuta, Siriako gerrak eragindako krisi humanitarioari erantzuteko.
Gaur egun, Zaporeak elkarteak elikagaiak prestatzen eta banatzen jarraitzen du modu erregularrean errefuxiatu-esparruetan, boluntarioen, elkarteen eta erakunde solidarioen arteko lan koordinatuari esker. Orain arte, 900 boluntariotik gora aritu dira proiektuan euren denbora eta ezagutzak eskainiz, bai Euskadin bai tokian bertan; horrez gain, errefuxiatuek ere modu aktiboan parte hartzen dute sukaldaritza-, banaketa- eta komunikazio-lanetan.
“Aiaraldeko Kuadrillatik herritarrei dei egin nahi diegu ekimen solidario honetan parte hartzera; izan ere, oso gutxirekin pertsona askori lagundu daiteke, eta beren etxeetatik ihes egitera behartuta egon direnek duintasunez elikagaiak jasotzea ahalbidetu”, adierazi du Kuadrillako presidente Iñigo Pinedok.