Aiaraldeko Kuadrillak martxoan zehar ekimen berri bat jarriko du abian, kirol femeninoaren sustapena bultzatzeko eta eskualdeko emakumeen autonomia eta independentzia indartzeko, ibilaldi nordiko talde bat sortuz.
Proiektu honetan Izaskun Bengoa Pérez izango da entrenatzailea, 2024ko Espainiako ibilaldi nordikoko txapelduna, kirol femeninoaren erreferentea eta konstancia, ahalegina eta lidergoaren adibide.
Jarduera martxoaren 6, 13, 20 eta 27ko ostiraletan garatuko da, 16:00etatik 17:30era bitartean, eta lehenengo saioa Respaldizan egingo da. Ez da material teknikorik behar izango, izan ere, entrenatzaileak bera emango du praktikarako behar den guztia.
Berdintasun zerbitzuak azpimarratzen du proiektuaren helburua kirol jarduera fisikotik harago doala: “Espazio segurua sortu nahi dugu, emakumeek elkarrekin sareak ehun ditzaten. Kirola tresna indartsua da ahalduntzeko, hau da, emakumeen autonomia eta independentzia pertsonala indartzeko.”
Bestalde, arloaren arduraduna den Laura Fernándezek nabarmendu du: “Ibilaldi nordikoa diziplina irisgarria eta maila fisiko desberdinetara egokitzeko modukoa da, horrek emakume adin eta esperientzia desberdinetakoen parte-hartzea errazten du. Horregatik, lau saio hauek oinarriak ezarri nahi dituzte martxoa amaitutakoan parte-hartzaileek beraiek antola daitezen eta praktikatzen jarraitu dezaten autonomiaz, taldetxoetan edo modu kolektiboan.”
Ekimena emakumeen taldea finkatzea du helburu, kirola praktikatzeaz gain, komunitatea eta elkarrekiko babesa sortuz, eskualdeko parte-hartze soziala eta ongizatea indartuz. Hori dela eta, Aiaraldeko Kuadrillak interesa duten emakume guztiak animatzen ditu osasuna, berdintasuna eta komunitatea uztartzen dituen proposamen honetan parte hartzera.
Izena emateko beharrezkoa da email bat bidaltzea helbide honetara: Berdintasuna@aiaraldea.org