Aiaraldeko Kuadrillak, Arabako Foru Aldundiarekin elkarlanean, tranpa-kanpaina berri bat jarri du abian liztor asiarraren kontrola indartzeko helburuarekin. Espezie inbaditzaile honek eskualdean hedatzen jarraitzen du eta mehatxu nabarmena da biodibertsitatearentzat zein nekazaritza-jarduerarentzat.
Ekimen honen baitan, tranpak eta erakargarriak banatuko zaizkie Aiarako, Artziniegako etaOkondoko herritarrei, ingurune naturala babesteko herritarren inplikazioa sustatzeko asmoz.
Kanpainaren helburua herritarrei tresna praktikoak eskaintzea da espezie inbaditzaile honen kontrol aktiboan parte har dezaten; izan ere, haren ugalketak arriskua dakar bai tokiko ekosistemetan, bai landa-eremuari lotutako ekoizpen-sektoreetan.
Materialaren banaketa martxoaren 2an hasiko da Okondoko Udalean; martxoaren 3an AiarakoUdalean egingo da; eta martxoaren 4an Artziniegako Udalean. Ondoren, martxoaren 5ean eta 6an, Aiaraldeko Kuadrillaren egoitzan jarraituko du. Kasu guztietan, jasotzeko ordutegia 12:00etatik 14:00etara izango da. Erakargarria jasotzeko, ezinbestekoa izango da interesdunek hornidurarako egokia den botila bat eramatea, gutxienez 125 ml-ko edukierakoa.
Parte-hartzaileek jarraibide teknikoak bete beharko dituzte tranpak behar bezala kokatu eta mantentzeko, horrela tranpaketaren eraginkortasun handiena bermatuz eta beste espezieengan izan litezkeen eraginak ahalik eta gehien murriztuz. Era berean, kanpainarekin elkarlanean arituko dira bilketari buruzko datuak itzuliz.
Kuadrillatik herritarrak ekimen koordinatu honetan aktiboki parte hartzera animatzen dira, azpimarratuz auzolanaren eta herritarren lankidetzaren garrantzia funtsezkoa dela ingurumenaren babesean eraginkortasun handiagoa lortzeko eta Aiaraldeko oreka naturala zaintzeko.