Aiaraldeko Kuadrillak 2026ko ekainaren 23an data berezia ospatuko du, Aiaraldeko Nagusien XXV. Topaketa antolatuz. Ekitaldi hau dagoeneko sendotuta dago eskualdeko adinekoentzako bizikidetza, parte-hartze eta aitortzaren erreferente gisa.
Aurtengo edizio berezi honetan, parte-hartzaileak Gasteizera joango dira, jardunaldi kultural, sozial eta ludiko oso batez gozatzeko. Bertan, Arabako hiriburuko bi leku esanguratsu bisitatuko dituzte: Santa Maria katedrala eta Bibat museoa. Horrez gain, programak garraioa, bazkaria, piknika, bisitak eta dantza barne hartzen ditu, esperientzia kolektiboa eta zahartze aktiboa sustatzeko helburuarekin.
Topaketa Aiaraldeko Kuadrilla osatzen duten bost udalerrietako (Laudio, Amurrio, Aiara, Artziniega eta Okondo) edozeinetan erroldatuta dauden 60 urtetik gorako pertsonentzat da.
Bikoteka izena emanez gero, gutxienez pertsona batek baldintza hori bete beharko du. Plazak mugatuak dira, eta lehentasuna izango dute eskualdean erroldatutako pertsonek.
Aiaraldeko Kuadrillako presidente Iñigo Pinedok topaketaren garrantzi soziala azpimarratu du bere hogeita bosgarren edizioan, eta adierazi du: “Aiaraldeko Nagusien XXV. Topaketa ospatzeak urte hauetan gure udalerrien arteko loturak indartu dituen eta gure adinekoei bizikidetza, kultura eta gozamen guneak eskaini dizkien ekimen bat balioan jartzea esan nahi du. Urteurren honek gure eskualdea eraiki duten pertsonekiko dugun konpromisoa adierazten du, kalitatezko jarduerak izaten jarrai dezaten merezi baitute”.
Bestalde, Gizarte Gaiak, Berdintasuna eta Kultura batzordeko presidente Laura Fernandezek nabarmendu du: “Topaketa hau askoz gehiago da txango bat baino: gure udalerrietako adinekoen arteko bizikidetza sendotzen jarraitzeko aukera da, gizartean duten funtsezko rola aitortzeko eta arreta bereziz prestatutako jardunaldi bat eskaintzeko, gozatzeko, partekatzeko eta Aiaraldean komunitatea eraikitzen jarraitzeko”.
Izen-ematea maiatzaren 18tik 29ra zabalik
Izen-emateko epea 2026ko maiatzaren 18tik 29ra egongo da zabalik. Parte hartzeko kostua 30 eurokoa izango da pertsonako. Prozesua errazteko, interesa dutenek eskualdeko hainbat tokitan eman ahal izango dute izena eta ordainketa egin, 9:00etatik 14:00etara, ezarritako egutegiaren arabera:
• Aiara (Udala): maiatzaren 18, 19, 25 eta 26
• Amurrio (“Nagusi”, Gela-Sala): maiatzaren 20 eta 27
• Laudio (Erabilera Anitzeko Aretoa): maiatzaren 21 eta 28
• Okondo (Udala): maiatzaren 21 eta 28
• Artziniega (Udala): maiatzaren 22 eta 29
Informazio gehiago lortzeko, antolakuntzak 686 20 46 56 telefono zenbakia jarri du eskura.