LAB Sindikatuak Zabaleko eskolari babesa adierazi eta Hezkuntza Sailak Amurrion egin nahi duen fusioa arbuiatzen du

Erabiltzailearen aurpegia

Jaurlaritzaren Hezkuntza Sailak maiatzaren 20an Amurrioko Lehen Hezkuntzako bi eskoletako fusioa egiteko proposamena egin zien Zabaleko eskola eta Mendiko eskolari. Fusio eta erabaki horren ondorioz, Zabaleko Eskola, Euskal Eskola Txikien Sarearen partaide dena desagertuko litzateke. Ondorioz, Amurrion, eskola publiko bakarra geratuko litzateke, eskola mapan galera handia eraginez.

Zabaleko Eskola, San Jose auzoan kokaturiko eskola txikia da. 62 urtez herriari eta herritarrei zerbitzua eman dion eskola. Amurrion eta San Jose auzoan errotua dagoena, anitza eta euskalduna. 

Amurrioko eskola mapak benetan behar al du titularitate publikoko den eta auzoan erroturik dagoen eskola ixtea? Bertako hezkuntza komunitateak ezetz adierazi digu, beraz, ez du inolako zentzurik fusioaren planteamenduak. Zein beharri erantzuten dio planteamendu zehatz honek? Fusioaren ordez zergatik ez da erabaki eskolaren proiektuak indartu eta aurrera egitea?

Eskola mapa eraldatuko duen eta eskolen arteko fusioa eragingo duten planteamenduak bertako hezkuntza komunitateekin partekatuak eta adostuak izan behar direla exijitzen du LAB Sindikatuak. Izan ere, adostua ez dena traumatikoa bilakatzen da. Beraz, ez dugu ulertzen Hezkuntza Sailak adostasunik gabeko prozesuak aurrera eramatea eta atzera botatzeko exijitzen diogu. Sailak 2021-2022 ikasturtea planifikatutakoaren arabera egingo dela iragartzea ez da berme nahikoa eskola txiki honen etorkizuna bermatzeko, beraz 2022-2023 ikasturtetik aurrera eskolaren etorkizuna bermatuko duen konpromiso bat ere exijitzen dugu.

Horregatik, LAB Sindikatuak babesa ematen dio Amurrioko Zabaleko eskolari eta bertako hezkuntza komunitateak antolaturiko mobilizazioetan parte hartzeko deia egiten du, lehena, Maiatzaren 28an arratsaldeko 17.30etan.

#ZABALEKOBIZIRIK

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide