IPUINA

Astegun buruzurietako ajeak (II): Teresa

Erabiltzailearen aurpegia

Egunean zehar lurrinez estali daiteke, baina gauek kartoi usaina daukate zapata kutxa batean bizi denean norbera. Eginbeharren oihartzuna buruan oihuka duela amaitzen du eguna Teresak, eta urtero gutxienez birritan ikusten duen hilketei buruzko YouTubeko saio bati adi begira afaldu du, azken astean ohitura duen legez. Burutik jota dago jendea gero, pentsatu du, horien aldean, txikikeria ematen du hegaluze lataren olioa harraskatik bota izanak, zuritu du bere burua. Munduaren joan-etorri azkarrak ez du guztiz anestesiatu, oraindik ezinegona sentitzeko gai da bere auzokidea hil arte bere lorategiko ipotxarekin kolpatu zuenaren historia jartzen duen bakoitzean. Sentitzeko gaitasun horrek pozten du. Izan ere, oso atsegin du Amelie filma.

Bideoa amaitu da eta oraindik entsalada erdia falta zaio. Udazkeneko tomateen zaporeak ez dauka isiltasunari aurre egiteko nahikoa intensidade, eta irratia piztu du segituan. Tracy Chapmanen Fast Car-en bertsio akustiko baten soinuak zirrararen antzeko zerbait eragin dio tripetan eta minutu batzuez sentitu du letxuga ez zela zelofanezkoa eta goteleak ez diola horren txarto egiten egongelako hormari. Bi gizonezkoen ahotsek eta Estatu Batuetako hauteskundeen analisiak bueltan ekarri dute bere zapata kutxara. Teresak gorroto ditu tertulianoak, eta orokorrean, irratian hitz egiten duen ia edonor. Azkar egin du harrikoa eta, gaur ere, hortzak garbitu gabe sartu da ohera.

Argia itzali baino lehen, zaintza faltagatik zimeltzen ari den mesanotxeko landareak gogorarazi dio bizirik dagoela.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide