Iñigo Martinez Cerrillok, funtzio publikorako zinegotziak, Laudioko Tokiko Garapen Agentziaren 2012 urteko memoria aurkeztu berri du. Prestakuntza eskaintza anitza, ekintzaileek aurkeztutako proiektuak eta enplegua sustatzeko ekimenak, besteak beste, azpimarratu ditu prentsaurrekoan eskainitako balorapenean.
Memoriak Garapen Agentziak lantzen dituen sei eremu nagusietan bildutako ekimenak zehazten ditu: Enpleguaren sustapena, prestakuntza eta trebakuntzaren promozioa, ekintzaileen eta enpresa sorkuntzaren sustapena, Enpresa Txiki eta Ertainen, ETE-en, laguntzarako ekimenen garapena, merkataritzaren sustapena eta landa eremuaren garapena.
Prestakuntza
“Une honetan urteko egutegia beteta dugu prestakuntzaren aldetik. Udal gobernutik bultzada eman diogu Garapen Agentzian egiten den prestakuntzari”, honela laburbildu zuen Iñigo Martinezek prestakuntza alorraren balorapena. Honez gain memoriak 2012 urtean Artza poligonoko egoitzak 150 lagun 13 ikastaro ezberdinetan bildu dituela jasotzen du. Arlo honek 113.000 euroko aurrekontua izan du.
Enpresa eremuari dagokionez, Bildu koalizioko zinegotziak Garapen Agentziak bideratutako erradiografia islatzeko ikerketan 46 enpresa lotu direla azpimarratu zuen.
Ekintzaileak
Ekintzaileei dagokienez, 40 proiektu aztertu ditu Agentziak, “Poztekoa da genero parekotasuna honetan aurkitzea” gaineratu zuen Martinezek arlo honetan. Proiektu hauetatik 17 enpresa sortu direla jaso du Agentziaren memoriak.
Merkataritza alorrean azkenik merkagune programatik eskuratutako dirulaguntza erabilera anitza izan duen karpa erosteko erabili dela azpimarratu zuen zinegotziak.